مشكلة عملاء البنك الاهلي بنقادة مع الجوابات المرسله

كتب : احمد عبدالسيد 

البنك الأهلي بيبعت كشف حساب مفصل لكل عملائه مكون من 3صفحات A4 مطبوعين بألوان فاخرة و حاجة في منتهي الشياكة.  والراجل  اللى بيوزعه ويجببه بيسأل عليا البلد كلها  والناس طبعا تشك  اه معاه فلوس 😂😂 وانا اصلا واخد قرض منهم عملاء البنك ال 11 مليون بيستهلكوا ما يقرب من 132 مليون ورقة بيضاء سنوياً علشان يستلموا الجواب ده 4 مرات في السنة ، يبصوا علي التقرير في 3 ثواني ، وبعدين يقطعوه. علي حسب ما قريت، كمية الورق دي بتستلزم قطع 15 الف شجرة علشان تتعمل! انا قولت يا واد حب البيئة، علشان البيئة تحبك و أتصل الغي الخدمة دي و أبدأ بنفسك. 

قوم ايه...الخدمة تطلع غير قابلة للألغاء من خلال خدمة العملاء بالتليفون، ولما رحت الفرع ، بلغوني ان رسوم الحساب السنوية هتزيد 250 جنية لو لغيت الخدمة دي! بيعاقبوني علشان قررت احمي البيئة و أقلل أستهلاك الورق.

ضيف علي كده ان شركات التوزيع بتتعامل مع الجوابات شديدة الحساسية دي بمنتهي الأستهتار. فتلاقيها مرة في مدخل العمارة ، و مرة متجمعين عند البقال، و هكذا.

البنك دلوقتي حاطتني في معضله أخلاقية انا مش قدها....احمي البيئة؟ ولا اوفر ال 250 جنية سنوياً؟ علماً بأن المبلغ ده ممكن يجيبلي باكيت بطاطس محمرة مرة كل شهر.

National Bank of Egypt البنك الأهلي المصري